ORANJESTAD,Aruba
Aruba Futura Foundation a wordo funda na 2018 pa yuda ehecuta e vision y plan nacional strategico di inovacion. Futura ta ehecuta e proyectonan inovativo bou mando di Minsterio di Asuntonan General. Den cuadro di transpariencia Futura a presenta nan relato anual pa 2019, den cual por a tuma nota cu nan a ehecuta 41 proyecto. Ministerio di Asuntonan General por ehempel a percura pa mehora e plataforma digital di “Bureau Rampenbestrijding” atraves di e proyecto “raven”, E-kabinet pa “ministerraad”, infrastructura digital pa Departamento di Impuesto y Ministerio di Infrastructura. Den e relato anual por wak tur e 40+ proyectonan cu a wordo ehecuta.
E-GOVERNEMENT UN PRIORIDAD PA 2020
Pa mehora servicio y calidad di e aparato gubernamental lo inverti mas intenso den e proyecto di E-government. Enfoke di e proyecto aki ta pa na mes momento haci e aparato gubernamental mas eficiente y asina na su turno baha gasto di e aparato. E proyecto aki a inicia na 2019 door di busca colaboracion cu “estonia E-government Academy”. Den cuadro di esaki hunto cu experto nan di Estonia lo percura pa e aña aki diferente servicionan di Gobierno por wordo brinda completamente atraves di un plataforma digital y introduci un plataforma digital pa diferente departamento.
B-LAB ARUBA y E-LEARNING
E proyecto di B-LAB Aruba ta uno cu ta enfoca riba enseñansa tecnico. Ya caba na 2018 y 2019 a percura pa atraves di e proyecto aki muchanan di tur edad por experimenta den un “laboratorium” cu tecnologia di mas moderno manera “robotica” y 3D-printers. Di e forma aki ta stimula nos hobennan pa enseñansa den e ramo tecnico y inovativo, cual lo conoce hopi trabou den futuro cercano.
Prome Minister sra. Evelyn Wever-Croes a anuncia cu e aña aki e proyecto di E-learning ta sigui y Colegio Pastoor Kranwinkel ta e scol cu e aña aki lo conoce inovacion atraves di E-learning y lo wordo entre otro ekipa cu material inovativo manera borchinan digital (CTOUCH).
PA CONCLUI
Nos a keda impresiona pa e trabounan desplega door di Futura na 2019 y nos ta wak cu e prioridadnan di sra. Evelyn Wever-Croes pa 2020 ta bon. Ta escohe pa inverti den nos hobennan y enfoca riba “future work vocational training” y desaroya e “skills” necesario pa por ocupa trabounan cu Aruba lo conoce den futuro debi na desaroyo mundial. Ta hopi importante pa for di awo brinda nos hobennan e oportunidad pa den futuro e cuponan di trabou por wordo ocupa pa nos hobennan.