ORANJESTAD,Aruba
Ta un pregunta cu Prome Minister a haya durante su bishita na scolnan
Den su discurso durante e Acto Protocolar riba Dia di Betico, Prome Minister Evelyn Wever-Croes a enfatisa riba un pregunta particular cu a wordo haci na dje door di un hoben. Durante e siman di celebracion di Dia di Betico, coleganan di Gabinete y Prome Minister a bishita varios scol y otro organisacionnan. E meta tabata pa combersa cu e hobennan riba ken ta Betico, y kico tur nos pais a logra Danki na Dje.
Cada scol a prepara pa e bishitanan na un forma unico. Algun a trece tur alumno hunto, y canta e Himno y hisa nos Bandera. Un otro scol a prepara un presentacion pa asina mustra con hopi nan sa di Betico. “Nos a pasa momentonan bunita y tambe di emocion”, Prome Minister a expresa.
Docentenan a prepara e alumnonan cu e informacion di e bukinan y tawata notabel cu e muchanan tabata fascina cu e storianan di Betico. Nan a scucha cu atencion tur locual tabata tin di conta nan y nan tambe a haci pregunta. Ta di aprecia y di ta orguyoso di mira con nos maestro y maestranan ta inculca e legado di Betico den nos muchanan. “Mi ta sigur awor cu e historia real di Betico ta graba den nan curason”.
Durante su bishita a surgi diferente pregunta for di hobennan curioso pa conoce mas di Betico y e impacto cu e Libertador di nos pueblo tin ainda riba e bida como politico y mandatario di Prome Minister. “Si Betico tabata na bida awe, kico lo bo a bise?”, un hoben a puntra.
Prome Minsiter a considera e pregunta aki hopi profundo biniendo di un hoben asina jong. Sinembargo, un pregunta facil pa contesta, di curason.
“Si Betico tabata na bida, lo mi a bise DANKI. DANKI pa a lucha pa nos biba den un pais autonomo, cu nos propio Gobierno, nos propio Parlamento, den cual nos por tuma nos propio decisionnan. DANKI pa a demostra cu maske Aruba ta un isla chikito, si bo tin vision y determinacion, bo por logra bo meta. DANKI pa a inspira nos, y pa sigui inspira nos, den kere den e idealnan di nos pais y di kier hiba nos pais padilanti. DANKI pa a sacrifica su mes y su famia y a pone e interes di pueblo di Aruba, prome cu su interesnan personal of familiar.
Si mi lo por a bisa Betico algo, e lo ta DANKI, pasobra ta Danki na Dje awe nos por lanta nos yiunan den e dushi pais aki cu yama Aruba”, tawata e contesta di Prome Minister Evelyn Wever-Croes riba e pregunta haci.
Prome Minister a enfatisa cu p’e ta un honor di por ta guia nos pais awe pasobra esaki ta yen’e cu un sentimento profundo di orguyo, especialmente como sobrina y iha di Betico. “Orguyo di a gara e bandera, y sigui cu e lucha”.
