ORANJESTAD,Aruba
Prome Minister Evelyn Wever-Croes:
Durante siman di celebracion di Dia di Betico Prome Minister ta bishita diferente scol
St.Rosa College na Oranjestad ta e scol na unda cu Prome Minister Evelyn Wever-Croes a haya su prome añanan di enseñasa escolar. Pa e motibo aki tambe diahuebs mainta, muchanan y docentenan di St.Rosa College a prepara un bunita bon bini na e mandatario principal di nos pais.
Prome Minister a wordo ricibi pa caranan alegre di tur mucha y un entusiasmo cu a wordo sinti di biaha na su yegada. Casi 200 alumno tawata para riba speelplaats cu nan bandera di Aruba den man na unda cu Cabesante di scol, Juffrouw Lai Ping a yama bon bini na Prome Minister. Despues a sigui cu e Himno di Aruba na unda tur mucha tawata duna e respet cu nos bandera merece.
Prome Minister a comparti e historia breve di e gran lider y estadista di nos pais, Gilberto François ‘Betico Croes’ enfatisando cu Aruba ta recorda e balentia di un luchador incansabel cu a logra nos Status Aparte riba su fecha natal, 25 di januari.
Prome Minister a enfatisa riba e tema di e aña aki: ‘Danki na Dje’. Danki na Betico, despues di lucha duro, entrante 1 di januari 1986, Aruba a logra Status Aparte. Betico a hiba un lucha sagrado pa nos libertad. Esaki ta nos ehempel pa sigui gara nos bandera y sigui lucha pa libertad di nos pueblo.
Esaki ta e dicho di Betico cu e muchanan mas tin graba den nan mente: “Si mi cay na caminda, gara e bandera y sigui cu e lucha”. Cu esaki, Prome Minister a laga atras un bunita mensahe pa cada mucha, pa nan no laga nada stroba e soño di nan curason pero traha duro semper pa logra nan meta. Cada un ta un Betico, sea mucha homber of mucha muhe, e importante ta pa sigui studia bon pa un dia logra nan meta.
Na final, un coro a presenta un cantica masha bunita y tur alumno di e scol a canta hunto lagando nan bos resona den melodia dushi.
Prome Minister a gradici St.Rosa College pa un bunita mainta y alabes a invita tur pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.
