ORANJESTAD,Aruba
E campeonato di Copa Betico 2020 di Arubaanse Voetbal Bond (AVB) ta yegando su final, unda cu den semi final e teamnan di RCA, Deportivo Nacional, SV Bubali y SV Dakota a topa otro. Diasabra lo tuma luga e wega final entre SV RCA y SV Dakota, kendenan a gana nan wega door di pinalti. Tur team a sa di duna e publico presente un bon wega di futbol y na final e teamnan SV RCA y SV Dakota lo topa otro diasabra den Guillermo Prospero Trinidad Stadion.
SV RCA a enfrenta Deportivo Nacional dialuna y den un wega cu ambos team a busca pa bay cu e victoria, e wega a termina empata na 1-1. A bay over na tironan di pinalti, unda cu RCA a bay cu e victoria di 4-3 pa asina hunga e final di diasabra. SV Dakota a topa SV Bubali diamars anochi y un biaha mas e wega di semi final a termina empata 1-1. SV Dakota a sa di bay cu e victoria di 4-2 pasando p’e final di diasabra.
Pa SV RCA tur wega contra di Deportivo Nacional ta basicamente un final, asina Giovanni Thodé, director tecnico di SV RCA, a expresa. Como e prome team cu a clasifica p’e final e pa nan esaki tabata felicidad, tin un dia mas di sosiego y sa ken lo ta nan contrincante. SV RCA ta invita pueblo di Aruba pa yega stadion y duna e hungadonan animo pa duna todo por todo durante e wega.
Ferdinant Robert, capitan di SV Dakota, a expresa cu e wega contra SV Bubali tabata uno duro. SV Bubali a haci nan huiswerk y a duna un bataya fuerte na SV Dakota. E wega a termina empata pero den e tiro di pinalti SV Dakota a sali victorioso pa hunga e final cual tabata nan meta. E final lo bay ta un bon wega y el a expresa di ta spera di retene e titulo di campeon Copa Betico. SV Dakota ta invita tur hende pa bin mira e final di Copa Betico 2020.
Despues di un semi final basta interesante entre Deportivo Nacional y SV RCA, SV Bubali y SV Dakota cu weganan a bay pinalti, esey ta un indicacion cu e weganan tabata riba bon nivel. Niun di e dos team a haya nada regala, asina Harvey Clement, competitie manager di AVB, a expresa. SV RCA a sinta warda pa mira kende lo a gana, mientras SV Dakota ta preparando pa diasabra. AVB ta evaluando pa habri ambos tribuna mirando e cantidad di fanatico, separa e dos fanaticonan y sigur disfruta di un tremendo final di Copa Betico 2020.
AVB tin un programa p’e anochi aki, unda cu trempan lo bay tin un DJ den e stadion y un grupo di scol di musica lo haci un baile folklorico pa asina trece ambiente celebrando Dia di Betico y pa 8:00pm e wega cuminsa. AVB ta invita tur fanatico di bon futbol, fanaticada di SV RCA, fanaticada di SV Dakota, pa yega stadion y apoya nan team preferi.
