ORANJESTAD,Aruba
Fundacion CINEARUBA ta haci un yamada na comunidad y comerciantenan pa yuda cu e desaroyo di talent di nos hobennan. Na maart di e aña aki un grupo di hobennan ta desea di representa Aruba na e competencia internacional di cine na Rotterdam, Hulanda.
E grupo di hobennan aki di cual nan pelicula a sali e miho pelicula di e proyecto di 48 ora organisa pa fundacion CINEARUBA lo bay representa Aruba na e competencia Filmapalooza unda tur pais lo competi contra otro pa e premio maximo cu tambe ta inclui e presentacion final na e prestigioso festival di cine ‘Cannes’ na Francia.
Ademas di e competencia e hobennan di Aruba lo ricibi diferente tayernan di cine, desde e parti tecnico, produccion y e parti empresarial. Un total di 12 tayernan creativo y educativo e hobennan lo por asisti. Den e programa tambe ta inclui un encuentro entre participantenan di Aruba, Bonaire, Corsou y Hulanda. Un encuentro cu diferente topiconan pa debati entre otro con pa reforsa e colaboracion entre e paisnan den reino. Tambe lo tin un presentacion di e peliculanan cortico di tur tres isla pa e publico di Aruba y e otro islanan residencia na Hulanda. Na final e hobennan di Aruba lo realisa conhunto cu esunan di Bonaire y Corsou un bishita na companianan y localidadnan di cine na Hulanda unda cu nan por haya mas informacion y un bista con cine ta wordo haci na Hulanda.
Personanan y companianan cu ta desea di aporta pa haci posibel cu cinco hoben por bay Hulanda na maart por haci un donacion via e portal di paypal: https://bit.ly/38ySTq7 of por haci un donacion directo via banco riba e cuenta di Fundacion CINEARUBA 2585730190 Aruba Bank. Pa mas informacion tocante e fundacion y su proyectonan por bishita e pagina web: www.cinearuba.com.
![Ban Yuda Hobennan Local Representa Aruba Na Hulanda 155 1 29](https://earubianonews.com/wp-content/uploads/2020/01/1-29.jpg)
![Ban Yuda Hobennan Local Representa Aruba Na Hulanda 156 2 26](https://earubianonews.com/wp-content/uploads/2020/01/2-26.jpg)
![Ban Yuda Hobennan Local Representa Aruba Na Hulanda 157 3 21](https://earubianonews.com/wp-content/uploads/2020/01/3-21.jpg)
![Ban Yuda Hobennan Local Representa Aruba Na Hulanda 158 4 15](https://earubianonews.com/wp-content/uploads/2020/01/4-15.jpg)