ORANJESTAD,Aruba
Prome Minister Evelyn Wever-Croes
Siman a habri cu bishita di Minister Knops di Hulanda kende probechando di e cumbre di Ministernan di Husticia di Reino cu a tuma luga na Corsou, a haci un bishita cortico di trabou na Aruba. Den e reunion cu Prome Minister Evelyn Wever-Croes, a toca diferente punto di interes comun entre Hulanda y Aruba.
Prome Minister: “E reunion a bay den hopi bon ambiente y cu hopi comprension”.
Riba e tema financiero, Prome Minister a splica cu Aruba no ta ainda unda cu nos mester ta pero si nos ta riba e bon caminda. Gobierno a cera aña 2019 cu un deficit di 0.1 % cu ta menos di loke a wordo palaba. A cera e aña cu e debe cu tawata 90 % pa 75 % di nos GDP. Nos a cera e aña cumpliendo cu e normanan di personal. Y a habri aña 2020 cu un presupuesto cu un surplus pa di prome biaha den hopi aña.
“Esakinan ta e señalnan y indicadornan importante cu ta mustra cu Gabinete Wever-Croes ta atende cu e tema financiero na un forma serio. Mi ta enfatisa, cu Aruba ainda no ta caminda cu nos mester ta, pero si nos ta riba e bon caminda. Esaki a pone cu e reunion cu Minister Knops a bay den bon ambiente”, Prome Minister a duna di conoce.
Otro topiconan cu a haya atencion den e reunion ta entre otro e relacion entre Hulanda y Aruba y e impacto di e crisis migratorio di Venezuela riba Aruba.
“E debe cu e Gobierno anterior a causa ta hopi grandi. Aña 2020 tin su retonan financiero ainda pero mi tin tur confiansa cu nos lo sali di e problemanan cu nos lo encontra di mes manera cu nos a haci’e den e aña anterior y pone Aruba bek riba e rumbo financiero positivo y saludabel pa asina nos desaroya nos economia mucho mas miho”, Prome Minister Evelyn Wever-Croes a enfatisa.