ORANJESTAD,Aruba
DIP ta bay cuminsa actua riba esnan cu tin tereno erfpacht bashi
Pa locual ta trata tereno pa famia construi un hogar, nos mester bisa, cu e proceso a cuminsa na mei 2018, y esaki ta bayendo bon. DIP ta bezig ta monitor e diferente fase nan cu a pasa caba. Cu e ultimo conteo di November 2019, nos tin un total di 185 akte pasa, y 220 persona cu ta sperando riba notario. Como DIP nos ta preparando e siguiente pre-reservering y reservering nan cu mester sali muy pronto. Overall, nos por bisa cu tur cos ta bayendo bon manera cu a planea.
Na e momentonan aki nos ta bezig cu e atraso di aña 2013, y e meta ta pa nos jega te cu 2018 prome cu aña 2020 termina. E situacion fastioso cu nos ta encontra, ta e cantidad di tereno limita cu ta disponible pa construi cas. Esaki ta nifica, cu DIP mester bay analisa segun un calculo, cuanto tereno por `bay duna pa e proximo 5 añanan.
Pa locual ta e problema di scarsedad di tereno, tin diferente manera cu nos por yuda baha e cantidad aki. Den pasado tin personanan cu a wordo otorga un tereno y nunca a construi riba dje. Esaki lo ta un di e prome accionan na unda cu DIP ta bay cuminsa actua riba, es decir esnan cu tin tereno erfpacht bashi. DIP ta haci un suplica pa nan cuminsa construi riba nan tereno.
Aña pasa DIP a manda carta na varios persona cu no ta cumpliendo cu ley, es decir, cu tin tereno erfpacht bashi y no ta haci nada alrespecto pa construi, y cu país Aruba lo tuma e tereno otorga bek. DIP ta calcula cu tin alredor di 4000 tereno erfpacht bashi cu a wordo otorga pa contrui cas.
E otro problema cu DIP a constata ta, cu tin un gran cantidad di casnan bandona y bashi rond di nos isla, y como DIP nos kier yega na un acuerdo cu e doño di cas pa wak con por intermedia pa soluciona e situacion. DIP ta consiente cu den nos “Landsverordering Uitgifte Eigendommen” ta stipula cu si bo cas ta bandona y bo no ta hasiendo nada cune, pais Aruba tin e derecho pa cuminsa un proceso pa kita e tereno.
Por ultimo, DIP ta bezig cu varios verkavelingsplan andando y nos ta bezig ta evaluando e mihor forma pa hinca esaki den otro, teniendo na cuenta e peticion di Minister pa evalua construccion bay halto, cu ta pone cu porta e verkavelingsplan lo por bira mas chikito, pero den un forma pa bay halto na unda cu e famia lo biba abou y drumi ariba.
Tur esaki lo por contribui cu DIP por jega na verkavelingsplan mas chikito, pa construi mas cas.
Pa locual ta e cifra di esnan cu a ricibi un pre-reservering caba, e ta importante pa DIP menciona cu nos mester warda riba e personanan cu a ricibi un pre-reservering, pa nan cumpli cu e varios rekesitonan, prome cu DIP por anuncia cuanto hende lo ricibi un reservering. Famianan cu no ta logra cumpli cu e rekesitonan stipula, DIP tin un acuerdo cu FCCA cu tin e tarea pa construi 250 cas pa esnan cu no ta jega na remarka.
Esaki ta un di e proyectonan cu DIP ta trahando conhuntamente cu FCCA pa evalua con tur cos ta bayendo cu e proyecto. Un cos cu nos sa, cu Aruba tin un scarsedad di tereno. E otro forma pa ricibi mas tereno ta, ta esnan cu tin tereno propio “eigendom” por bende esaki na esnan interesa pa cumpra un pida tereno. Tur e formanan aki por juda pa un famia ocupa un tereno y cuminsa construi nan hogar.
![Dip Ta Calcula Cu Tin Alredor Di 4000 Tereno Erfpacht Bashi Cu A Wordo Otorga Pa Contrui Cas Y Te Awe No Tin Nada Construi 155 Logo Dip 2 1](https://earubianonews.com/wp-content/uploads/2020/01/Logo-DIP-2-1.jpg)
![Dip Ta Calcula Cu Tin Alredor Di 4000 Tereno Erfpacht Bashi Cu A Wordo Otorga Pa Contrui Cas Y Te Awe No Tin Nada Construi 156 Haime Croes 2](https://earubianonews.com/wp-content/uploads/2020/01/Haime-Croes-2.jpg)