ORANJESTAD,Aruba
Segun acuerdo di Nationan Uni tur mucha bou 18 aña tin derecho riba cuido di salud pa nan por crese y desaroya sano. Pa por cumpli cu e derecho aki, seccion cuido salud hubenil ta bishita tur scol primario y basico na Aruba pa duna cuido di salud preventivo na nos muchanan. Durante e controlnan di salud aki nos enfermeronan y docternan ta controla e aspecto fisico, mental y social di nos muchanan.
Como cu esaki ta derecho di tur mucha, e mayor of voogd cu tin un jiu ta bishita scol primario of basico ta wordo informa di e controlnan pa medio di un carta na momento cu e mucha cuminsa scol primario of basico pa prome biaha. Mayor cu no ta desea of tin obhecion pa su yiu ricibi e control di salud tin pa haci esaki por escrito atravez di e carta cu nan ta ricibi na cas for di seccion cuido salud hubenil. E controlnan di salud ta sosode durante e añanan cu e mucha ta na scol.
E mayornan cu no tin obhecion y cu si ta desea di ricibi e servicio di cuido di salud pa nan yiu, no mester entrega ni tampoco manda ningun carta bek pa nos. Di e manera aki seccion cuido salud hubenil ta cuida y proteha salud di nos muchanan di Aruba.
Pa mas informacion por tuma contacto cu seccion cuido salud hubenil na 5224200 of mail nos na jgz@despa.gov.aw
