ORANJESTAD,Aruba
Awe 8 di januari 2020 a tene e prome reunion di directiva di Camara di Comercio y Industria di Aruba (KvK). Un di e puntonan importante di agenda pa e reunion aki tabata eligi un presidente y vice-presidente di e directiva pa aña 2020.
Representacion diversifica den directiva
E directiva di KvK ta consisti di miembronan cu ta representa negoshinan cu ta forma parti di grootbedrijf y kleinbedrijf. E miembronan di directiva a elegi unanimamente Sr. Satish D. Daryanani como presidente y Sr. Omar Tromp como vice-presidente di e directiva pa aña 2020. E directiva ta conta tambe cu tres miembro nobo den persona di sra. Sandy Odor (grootbedrijf), sr. Gerardus (Geert) Weber (grootbedrijf), sr. Daniel Ferrara (kleinbedrijf). Sr. Omar Tromp (kleinbedrijf) a wordo reeligi como miembro di directiva. Otro miembronan cu a keda den directiva ta sra. Monica Kock, sr. Satish Daryanani, sr. August (Anthony) Croes, sra. Wanda Broeksema y sra. Alexlindy (Lindy) Croes. E presidente y vice-presidente, hunto cu e secretario/director ehecutivo, Sr. Martijn Balkestein, ta forma e directiva diario di Camara di Comercio. Sr. August (Anthony) Croes lo fungi como presidente suplente den caso cu e presidente of e vice-presidente ta ausente. E directiva di KvK ta encarga cu e maneho y strategia di e organisacion y e secretario/director ehecutivo, hunto cu e personal di KvK, ta percura pa e funcionamento y actividadnan diario di KvK.
Un team cu tin comercio na pecho
E directiva di KvK ta hopi entusiasma y KvK ta premira cu hopi retonan existente lo haya nan debido atencion. E board ta consisti di empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico. E funcion di un miembro di directiva ta basa riba e deseo pa traha na bienestar di comunidad di Aruba. E ta un trabou boluntario di e empresario cu ta duna extra di su tempo banda di maneha su propio negoshi pa di e forma aki yuda hiba Aruba completo dilanti.
Directiva di KvK ta cla y dispuesto pa yuda tur cliente y miembronan di KvK y tin oido pa tur preocupacion y conseho di e sector comercial. KvK lo continua cu su metanan y lo sigui traha duro y brinda conseho na gobierno di Aruba pa comercio di Aruba por sigui crece. Directiva di KvK ta comparti su experiencia profesional y hunto cu KvK lo sigui stimula ideanan inovativo.
Aruba, 8 januari 2020
Camara di Comercio y Industria (KvK)
