Camara di comercio a yama un conferencia di prensa pa asina comparti diferente informacionnan valido. Un tema cu ta di preocupacion ta e scarsedad di empleado cu tin na Aruba den sector turistico. Pa un tempo caba e punto di scarsedad di trahado ta un punto di preocupacion mirando cu esaki ta afecta companianan y tin varios compania cu ta saca vacaturanan y no ta logra haya trahado. Camara di comercio ta consciente cu tin mas aspecto cu ta contribui na e scarsedad cu ta e sector laboral di Aruba.
Sue-Ellen de Freitas Sousa – Head Business Information & Support na Camara di Comercio ta indica cu stakeholdernan manera ATA , AHATA,CUA y KVK ta reuniendo pa duna prioridad na e punto aki. Tambe a reuni cu minister di labor pa asina discuti riba e tema aki y alabes a duna recomendacionnan. Abase di e parti aki KVK a tuma e iniciativa pa tene un encuesta bao di e clientenan di KVK cu ta e comerciantenan y na unda cu a ricibi mas di e pensamento di e comerciantenan riba e scarsedad di trahadonan cu tin mester den e sector turistico.
Den e encuesta aki tambe ta haya un bista kico ta loke e comerciante ta bibando cu ne y di e manera aki ta trata di haya un analisis y un bista mas amplio di loke ta e preocupacionnan di e comerciantenan.
E encuesta ta riba e website di KVK algun dia caba unda cu un cantidad di 340 persona a yena e encuesta aki. E comerciantenan cu ta interesa di participa por haci esaki online. E resultadonan cu tin te na e momentonan aki ta diferente un di nan ta e dificultad cu e companianan ta experenciando ta pa por haya candidatonan cualifica pa por yena e vacaturanan habri, 81 % ta indica tin dificultad cu e parti aki , 71 % ta indica cu e problema ta serio y cu mester actua riba e parti aki. Banda di tin un scarsedad general pa haya hende pa traha tin dificultad pa haya personanan pa traha cu un conocemento specifico pa eherce un trabao, esaki ta un necesidad basta halto actualmente na Aruba.