E aña aki ta marca un aña di hubileo di varios instancia cultural manera Departamento di Cultura cu a cumpli 45 aña di servicio y Scol di Musica Rufo Wever cu a cumpli 70 aña treciendo educacion di musica pa nos comunidad. Asina tambe Cas di Cultura, e unico centro cultural cu un teatro den e parti Caribense di Reino, ta cumpli 65 aña dia 15 di November proximo. Den e cuadro aki Stichting Schouwburg Aruba, e fundacion cu ta encabesa Cas di Cultura for di comienso, ta organisa un anochi special pa invitado, sinembargo tin algun espacio pa comunidad join e celebracion, y por haya sa mas tocante esaki riba e rednan social di Cas di Cultura.
SEMPER YEN!
Puntra cualkier organisado di evento cultural, nan lo bisabo cu Cas di Cultura semper ta yen y mester “book” hopi adelanta. Kico esaki ta nifica? Simplemente cu nos pueblo ta frecuenta Cas di Cultura den un grado hopi halto cu ta haci cu organisadornan ta keda trece nan bunita presentacionnan riba nan plataforma stima. Por bisa orguyosamente cu un averahe di 40% di nos populacion ta bishita Cas di Cultura den un aña. Sin lubida e miles di talentonan, di tur edad, cu pa 65 aña a honra publico cu nan presentacionnan. Esaki no ta nifica cu no tin reto, por ehempel e team ta relativamente chikito compara cu teatronan hopi mas chikito den exterior, un edificio grandi y relativamente bieu mester su mehoracionnan amplio na dado momento pa keda relevante. Tambe promocion di actividad a bira un parti sumamente importante y caro, compitiendo cu hopi otro tipo di evento riba e isla.
UN CENTRO CULTURAL MULTIFACETICO INSPIRATIVO
Den e ultimo añanan team y directiva, bou guia profesional tambe, a bin ta formula, no solamente un espacio renoba cu ta cuadra cu a standard moderno di teatro, scolnan di arte y lugarnan publico, pero tambe a pensa riba e funcionan extra cu lo complementa Cas di Cultura pa bira ainda mas accesibel pa nos comunidad. Por pensa por ehempel riba un horeca mas profesional, ampliacion di camerino y sala di exposicion, un lift pa bay ariba, un sala grandi pa banda practica na Scol di Musica, un local di arte, un VIP balcon, un hardin di evento, un tienda di souvenir cu loket di ticket aden y un interior modernisa y cu ta inspira. Man den man cu esaki lo modernisa tambe procesonan interno, di huur y sin lubida, cual ta hopi importante, e programacion di eventonan cu Cas di Cultura mes ta trece y organisa, kende ta complementa e programacion cu ta wordo treci door di tercera partida. Esaki, semper combina cu aspectonan educacional, inspirativo y diferente. Nos ta kere den programacion y programanan cu ta stimula y mehora e autoestima y autoexpresion di nos hobennan, un parti cu generalmente mester mas desaroyo na Aruba. Arte ta un medio excelente pa yuda e meta aki. Nos plataforma nacional ta hunga un rol importante den biba y salvaguardia nos herencia cultural, manera nos bailenan, musica y nos lenga materno Papiamento.
BO DESEO PA CAS DI CULTURA
Cas di Cultura kier tende di bo! Tanto den cuadro di hubileo aki y pa cu nos futuro direccion. Un renovacion ta un hecho evidente, pero kico lo bo kier wak den e programacion, servicio, extorno, interior etc. Laga nos sa di bo ideanan constructivo via e link aki https://forms.gle/BNuoiXg5kfWo7nnJA y participa na gana 2 ticket pa e concierto “The History of Bossa Nova” di Aymar Torres & Band, dianan 20 y 21 di december.
DANKI ARUBA
Raad van toezicht, directiva y personal di Cas di Cultura ta gradici comunidad di Aruba, nos publico aprecia y tambe ex-miembronan di directiva y personal di Stichting Schouwburg Aruba pa e apoyo y trabou incondicional cu a brinda durante añanan. Hunto nos a logra pa tey 65 aña y nos lo keda traha duro pa e decadanan cu ta bini.
