Consulado di Venezuela na Aruba ta un di e puntonan rond mundo unda cu e 60 mil Venezolanonan registra den exterior por vota awe pa un e presidente nobo di Venezuela.
Un di e ciudadanonan presente na e sede di votacion aki na Aruba tabata Wilson Antquera, kende a cuminsa pa bisa cu “nos ta aki pa e rescate di Venezuela. E ta un fiesta unda nos mester uni como Venezolano.”
Sinembargo Wilson no por a keda sin expresa su preocupacion y inkietudnan cu el a sinti den henter e proceso prome cu a yega na e fecha aki di eleccion. E y otronan ta sinti un abuso sistematico den e forma di inscribi of registra e personanan. Un proceso cu a mina e derecho sagrado pa un persona por deposita su voto y eligi e presidente di su pais.
Manera ta conoci, aki na Aruba ta duna permiso pa un aña y cada aña mester haci e proceso di nobo. Ciudadanonan a wordo perhudica ora cu e Consulado a nenga di registra nan pa e simpel motibo cu nan permisi ta vence den luna di october. Diripiente a bini cu e condicion cu e permiso mester tin un validez di mas cu un aña. Siendo cu e persona cu kier a registra tabatin su di cinco permiso caba.
Otro obstaculo ta cu e mashin di registra mester a yega pa 18 di maart pa por cuminsa registra., Pero aki tabata un fecha festivo, pero e mashin no a yega tampoco e dia siguiente. A tarda un poco y ora cu a pensa cu ta duna dia adicional, esaki no a sosode. Consecuentemente, hopi Venezolano no por a regla pa pidi liber pa por bay registra nan mes pa vota.
E problema aki a sosode mundialmente. Supuestamente tin 4 miyon y mey, tin ta papia di 7 miyon persona, pero apenas 60 mil a logra registra na tempo.
E situacion aki ta laga un sabor amarga pa e Venezolanonan residencia den exterior. “Nos tur kier e libertad di Venezuela. Pero nos ta satisfecho pasobra esunnan na Venezuela tambe kier e cambio.” El a papia di casi 70% di e ciudadanonan na Venezuela cu ta desea un cambio.
Na e momento aki 84% di e pueblo kier bay vota y rond di 78% ta na fabor di un cambio, dirigi pa Maria Corina Machado, pero kende no a wordo permiti door di e regimen di Maduro pa participa den e eleccion. Edmundo Gonzalez
Venezolanonan ta sigur pasobra e biaha aki Madurismo no tin e forsa pa gana e eleccion.
