Parlamentario Endy Croes a splica cu e ta masha contento cu e desicion di Ministerraad unda a alarga FASE pa henter aña 2021. Parlamentario Croes den nomber di Fraccion di MEP a manda un carta oficial pa Minister Glenbert Croes cu e peticion pa busca sosten den Ministerraad pa alarga FASE minimo te cu fin di Juni. Minister Glenbert Croes recien a anucia cu Ministerraad a bay di acuerdo y a alarga FASE pa henter aña 2021.
/// 50.128.954 florin inverti den FASE te cu Februari 2021:
Un total di 11783 persona a hasi uso di FASE desde maart 2020 cu FASE a inicia. Luna di Februari 2021 un total di 3767 persona a cobra FASE na balor di 3.5 miyon florin. Desde cu FASE a inicia te cu februari 2021 un total di 50.128,954 florin a wordo paga pa brinda un sosten na esnan den dificultad. Minister Glenbert Croes recien a combense Ministerraad pa continua cu esaki pa henter aña 2021.
/// FASE lo cambia na caminda y lo bira TIO:
Di acuerdo cu informacionnan comparti pa Minister Glenbert Croes cu FASE lo continua pero tin un team di entreotro Minister di Finansas, Minister di Husticia y Minister di Sociale Zaken ta trahando duro pa introduci TIO. TIO lo remplasa FASE na caminda momento esaki keda kla y keda aproba. TIO ta “Tijdelijk Inkomen Ondersteuning” cual ta bay tin un minimum y un maximum inkomen. E minimum zo y zo lo bay ta mas cu FASE y ta cuminsa na Afl.1250,-. Manera a wordo splica cu cu e programa aki cu lo replasa FASE den futuro lo bay tin obligacionnan mara na dije. Personanan “mester” asisti na programanan di her of bij scholing, “mester” keda solicita pa trabou y obligatoriamente mester hasi servicio comunitario mientrastanto. Meta di TIO ta pa mas pronto posibel e persona por logra drenta bek mercado laboral. Terminando gobierno ta trahando duro pa brinda ayudo na e ser humano cu ta cenral pa e gobernacion aki y ta pidi tur hende percura pa mantene disciplina pa nos por derota e virus aki. Aplica alaves pa vacuna paso e vacuna ta e solucion a corto termino pa hunto nos por hiba Aruba bek den un funcionamento di normalidad.
