Na bordo di Zr.Ms. Groningen, Djaluna 8 di Aprel, a selebrá un hecho memorabel importante: hubileo 30 aña di kolaborashon estrecho entre Estádos Unídos i Hulanda riba tereno di lucha kontra trafikashon di droga den Region Karibe. E hubileo a tuma lugá na Key West, Florida, na unda e sede di “Joint Inter Agency Taskforce South (JIATF-S)’ ta situá.
JIATF-S ta un organisashon úniko internashonal, guia pa Estádos Unídos, ku ta trese huntu 19 pais i organisashon, tal manera FBI i DEA, den e lucha kontra kriminalidat relatá ku droga den Region Karibe. Marina Real ta hunga un ròl krusial den e organisashon guiá pa Estádos Unídos. Hulanda ya pa 30 aña ta forma Task Group 4.4 i ta proveé diferente unidat pa operashonnan anti-droga. Komo Komandante di Forsanan Naval den Region Karibe Hulandes (C-ZMCARIB) Kòmandùr Walter Hansen ta guia e grupo di tarea.
Kòmandùr Hansen ta deskribí e kolaborashon intensivo komo un “bon matrimonio”, den kua e hubileo di 30 aña ta marka un hecho memorabel importante. “Tránsito di droga ta un problema kompleho ku ta rekerí un enfoke internashonal”, sigun Kòmandùr Hansen.
E regreso di Zr.Ms. Groningen den Region Karibe Hulandes ta simbolisá e kompromiso di Hulanda den e lucha kontra trafikashon di droga i kriminalidat transfronteriso. Asina Defensa ta kontribuí na pas i siguridat den Region Karibe Hulandes.
