Riba djaweps 30 di novèmber 29 partisipante entusiasmá a finalisá nan kapasitashon di ‘Atenshon pa kliente i Enfoke riba kliente’ i ‘Abilidat Sosial’ ku éksito. Di e grupo akí 16 persona a siña tokante atenshon pa kliente i 13 hende a siña tokante abilidat sosial.
Na luna di ougùstùs 2022 Entidat Públiko Boneiru a sera un akuerdo di kolaborashon ku Fundashon FORMA. E kursonan ta na papiamentu i nan ta pa hende ku ta traha kaba den sektor turistiko, pero tambe pa hende for di otro sektornan ku ke mehorá nan abilidatnan.
Diputado di Turismo i Ekonomia Clark Abraham a indiká: ‘E meta ta pa nos tin un turismo ku ta bon pa nos habitantenan. Nos komunidat lokal ta hopi importante pa desaroyo di turismo, pa konservashon di nos identidat i nos kultura i pa turismo sostenibel.’
E treinernan Gianetta Ignecia i Milizaira Felipa ta hopi orguyoso di e partisipantenan. ‘Durante e kapasitashon bo ta mira e hendenan bira kada biaha mas sigur di nan mes. Nan tabata gosa di mira kon bon algu ku nan a siña ta funshoná ora di bèrdat nan bai hasi uso di dje. Nos ta spera ku e kapasitashon ta benefisiá nan hopi, den nan trabou i tambe den nan bida di tur dia,’ segun Ignecia i Felipa.
E partisipantenan a risibí nan sertifikado durante un seremonia. Nan treinernan a hasi entrega di e sertifikadonan i nan a haña un sertifikado spesial di diputado Nina den Heyer. ‘Esaki ta un bunita kolaborashon entre TCB, BONHATA, Entidat Públiko Boneiru i FORMA, kaminda Entidat Públiko Boneiru a paga pa e kapasitashonnan. Ku esaki nos ta yuda Boneiru su hendenan pa haña mihó trabou i gana mas tantu sèn. Ta tremendo pa hasi 29 hende kontentu ku nan sertifikado!’, segun Nina den Heyer.
E éksito di e kapasitashonnan akí ta mustra ku e tipo di yudansa akí ta funshoná di bèrdat pa kresementu personal i profeshonal.