24 eksperensia nobo na Boneiru

Tour ku aventura, restorant nobo i mas den 2024

E perla skondí di Karibe ta yen di desaroyo eksitante i ku rutanan nobo di buelo, tantu amantenan di bon kuminda i naturalesa, komo personanan ku ta en buska di aventura tin tur oportunidat pa nan mes eksperensiá Boneiru personalmente.

E destinashon ya kaba ta konosí komo e paradiso di buseo di mundu, pero e ta birando mas i mas popular tambe pafó di e mundu espektakular di bou di laman. E isla chikitu akí kisas tin mes tantu flamingu komo habitante, pero no ta sinti falta di eksperensia nobo. Ku mas sabor internashonal i mas opshon kulinario, mas akomodashon renobá i mas aktividat na aire liber pa tantu e poblashon lokal komo pa bishitante na aña 2024, akí bou tin 24 di Boneiru su mihó eksperensianan pa deskubrí den e aña nobo akí.       

It’s in Our Nature

E énfasis ku Boneiru pa hopi aña kaba ta pone riba sostenibilidat i protekshon di medio ambiente, ta invitá bishitantenan pa sali for di nan zona komfortabel i drenta den naturalesa. Na aña 2024 nos isla ta ofresé un seri di posibilidat dibertido pa hasi esaki, entre otro:  

 

1. Na aña 2023 e Nature Cooking School a habri pa ofresé siñamentu ku enfoke riba eksperensia na personanan individual òf gruponan pa hasi konekshon ku naturalesa, siña tokante e forsa di kuminda i edifiká un komunidat pa medio di kushiná i planta pa kome. Pensa riba trahamentu di mansa i kolektá bèrdura di bo propio hòfi pa un ‘Food Forest Pizza”, miéntras boso ta kompartí un plato ku otro i haña un konekshon mas profundo ku Mama Tera.

 

2. Pa e aventureronan ku ta en buska di desafio riba nos isla, Packraft Trip Bonaire ta e mihó eksperensia nobo na aire liber. Packraft Trip ta organisá vários aventura via un ruta eksitante ku ta konsistí di kanamentu, bishitá diferente bich ku un vlòt, kore mountainbike, kore den djip, nabegá den boto di bela riba laman, snòrkel na Klein Bonaire i mas. Nan por organisá aktividat di teambuilding tambe ku un aspekto kompetitivo.

 

3. Epic Tours a uni forsa ku Buddy Dive, un di e risòrtnan ikóniko di nos isla, pa ofresé su wéspetnan un ‘Sail, Dive & Dine-tour’ ku ta kombiná e risòrt su sambuyamentu bou di guia ku un servisio ‘all inclusive’ di Epic Tours na bordo di un katamaran. Banda di esaki tur djárason pa 16:15 or Epic a añadí un tour riba katamaran yamá Sunset Bliss, inkluso kuminda, bibida i entretenamentu musikal. Otro opshonnan nobo riba boto di bela ta entre otro Lady Bellaïs, un golèt brasileño enkantador ku ta ofresé un diferente eksperensia di nabegashon, ku ta varia di biahe riba boto durante lùnch, kompleto ku dushi pasaboka i kos di bebe, te ekskurshon di snòrkel i tour di ‘sightseeing’.

 

4. Na aña 2024 Buddy Dive Resort ta selebrá 40 aña di ‘Hilma Hooker Diving’ ku un aventura históriko bou di laman ku ta dura un siman na luna di sèptèmber. Ta trata di un di e oportunidatnan mas konosí pa sambuyá bai na un barku ku a senk. E barku ta den un estado ekselente i ta fásil pa yega serka dje for di kosta, pero tambe ku boto. Originalmente nan a konstruí e barku di karga Hilma Hooker na aña 1951 i na aña 1984 nan a laga e senk na Boneiru.

 

Mas posibilidat pa hasi paseo

Sea ku bo ke eksplorá e impreshonante paisahenan di Boneiru pa medio di boto, òf bo ke disfrutá di e eksperensia fásil di ‘Drive and Dive’ di nos isla, tin algun posibilidat nobo pa transportá bishitante for di punto A pa punto B i tur otro sitio ku ta keda meimei di esakinan.

 

5. Pa e personanan ku ta en buska di un sistema mas favorabel pa medio ambiente pa move riba nos isla sostenibel, Hopp Bonaire ta ofresé baiskel i skuter ku ta kana dilanti ora ta trata di hasi paseo den un forma mas bèrdè i mas fásil riba nos isla, pa medio di uso di vehíkulo eléktriko òf karbonneutral.      

 

6. Golf Cart Rental Bonaire a habri na aña 2023 i ta un manera dibertido i úniko pa mira Boneiru i gosa durante henter e paseo di bistanan 360° i un dushi brisa fresku.  

 

7. Epic Tours Bonaire Watertaxi ta ofresé awor un sitio nobo di salida ku lansamentu di su servisionan diario for di e Water Sport Center Bonaire ku resientemente a habri den Courtyard by Marriott pa transportá wéspetnan di e hotèl pa Klein Bonaire.  

 

8. Nikol Luxury, un yate Navigator 53 klásiko, ta disponibel awor akí pa ofresé maksimalmente 30 wéspet e mihó eksperensia na bordo. Nikol ta ofresé tour tambe i ta ekipá ku un ‘master bedroom’, un propio baño, un ‘staple bedroom’ i un ‘queen bedroom’ pa charter.

 

Bon Bites – Bon Kuminda

Na aña 2022 World Food Travel Association a proklamá e esena di komementu ku ta kresiendo na Boneiru komo Kapital Kulinario i e ta unu ku na aña 2024 bishitantenan tin gana di mira (i purba). Ku mas di nuebe establesimentu nobo di kome disponibel, entre otro eksperensianan VIP i un restorant ku terasa riba dak, e isla chikitu akí, pero ku un sabor grandi, sigur lo satisfasé un kantidat grandi di gustu.

 

9. Na aña 2023 2  Fools and a Bull a habri un bar íntimo den forma di un U na Playa, desiñá pa 17 wéspet na mes momentu. E eksperensia kulinario akí, solamente pa adulto, ta bou di maneho di dos ‘fool’ ku huntu tin 45 aña di eksperensia den e ramo akí i ku ta papia tokante biña, komementu i tur loke tin di haber ku kushinamentu, miéntras nan ta prepará un sukulento sena di 5½ plato pa nan wéspetnan.

 

10. Aña pasá Zara’s Bonaire a subi plasa i a establesé su mes den Stichting Art Center den bario di Antriol. Zara’s ta un kombinashon di un galeria di arte i un konsepto refiná di komementu. Nan ta ofresé un ‘private chef’s table’ i e úniko restorant riba ‘rooftop’ na nos isla, kaminda e wéspetnan por haña un menú ku ta konsistí di sabornan internashonal ku e ingredientenan di mas fresku, tantu lokal komo for di henter mundu.

 

11. Na kuminsamentu di aña 2024 un restorant nobo ta habri su portanan den sentro di Playa – Kralendijk. The Bucket, un delisioso meskla di un ‘grill’ i un ‘cocktailbar’, lo duna un interpretashon nobo na e kultura gastronómiko di Boneiru, kaminda kuminda, bibida i entretenamentu ta para sentral. Tur dia tin un Happy ‘Bucket’ Hour for di 17:00 or te 19:00 or. Tin pantaya grandi di televishon pa eventonan eksitante pa habitantenan lokal i bishitantenan, i e entretenamentu ta sigui te den oranan lat di anochi.

 

12. Hooked by Sunsets a habri na fin di aña 2023 i ta un bar i restorant lokal ku ingredientenan fresku di kalidat haltu i biña sabroso. E menú karibense ta un lista di plato chikitu ku ta kambia kada biaha i ku bo por kompartí ku otro, yenyen di sabor spesial manera Lobster Hot Dog, tur kos prepará ku hopi amor na e restorant mes.

 

13. Casa Bizarro ta ofresé un meskla di kushina asiátiko i platonan internashonal prepará kuidadosamente ku ta kuadra masha bunita ku otro na nos isla Boneiru. Rápidamente e restorant nobo a hala tur atenshon pa motibu di su kolónan bibitu, su interior di djùngel, su esfera akogedor i su ekselente kuminda i kòkteilnan. 

 

14. Resientemente Biña Restaurant a habri den Chogogo Resort, direktamente na bich kaminda nan ta sirbi un bista karibense inolvidabel, banda di platonan internashonal, opshonnan ‘à la carte’ i un menú luhoso di e shèfkòk. E nòmber na papiamentu ‘Biña’ no ta un sorpresa, mirando ku e doñonan di e restorant tin konekshon ku Alpasión, un finka ku plantashon di biña biológiko na Argentina, di manera ku e ‘sommelier’-nan por selektá e mihó biñanan komo komplemento pa e sena.

 

15. Number Ten rápidamente a bira un favorito serka e fanatikada na nos isla. E restorant kolorido i ku dushi ambiente akí, ta situá den un edifisio históriko den sentro di Playa – Kralendijk. Aña pasá el a habri su portanan i ta ofresé un ‘café’ luhoso pa desayuno i lùnch ku ta sirbi un propio variante di e In-N-Out Burger.

 

16. Awor akí despues di un buelo largu bishitantenan por akumulá energia bèk den e Blue Lagun Café Bonaire enfrente di Flamingo Airport. E ‘lounge & café’ luhoso akí ta sirbi un menú di lùnch lokal ku ta kambia tur siman, ku sabornan outéntiko i un toke moderno. 

 

17. Boneiru ta e kas di sabor for di henter mundu. E doño i alabes shèfkòk Juan de Sousa di e popular restorant eksistente C’est la Vie, na luna di yüni 2023 a habri un di dos restorant: Maçaroca Madeira Bar Restaurant Bonaire. Maçaroca Madeira, situá den South Pier Mall, ta sirbi sukulento platonan portugues. Di un otro banda Carlitos ta un restorant kolorido den sentro di Playa – Kralendijk, kaminda nan ta ofresé platonan i bibidanan di inspirashon meksikano, manera taco fresku prepará i un delisioso Margarita. Nan ta habrí for di djaluna te ku djabièrnè pa lùnch i sena.

 

18. Pa satisfasé bo gana di kome kos dushi, bo tin ku purba John’s Ice Cream òf Artisan Bakery, ámbos a habri na luna di desèmber 2023. Artisan Bakery ta situá den Kaya Grandi i ta ofresé produktonan fresku di zürdé i sabroso pan di kané. Nan ta habrí for di djárason te ku djasabra di 08:00 or pa 15:00 or. John’s Ice Cream a bira un faborito lokal ku sabornan úniko di eiskrim, manera e Caribbean Rum Raisin, trahá di Ròm Rincon.

Hotèl renobá

Boneiru ta ofresé bishitantenan un variedat grandi di akomodashon, for di butik hotèl i vila, te risòrt ‘all inclusive’. A aktualisashonnan menshoná akí bou ta intenshoná pa mehorá eksperensia i tambe pa habri porta pa mas wéspet ainda.

 

19. Delfins Beach Resort a mehorá su alohamentu ku añadishon di algun vila nobo ku 3 i 4 kamber di drumi i pisina privá luhoso di awa friu (plunge pool), di manera ku ta amplia e oferta te na un total di 20 vila. E risòrt ekstenso ta disponé di dos pisina, un sentro di di buseo i sinku restorant hopi elogiá, entre otro Senang Restaurant, ku a kaba di lansa un menú nobo, inspirá riba Asia, Medio Oriente i mas.

 

20. E hotèl ‘all inclusive’ ku enfoke riba famia, Divi Flamingo Beach Resort & Casino, a pasa den un renobashon drástiko i resientemente a entregá vários studio renobá. Ku kitchenette, komedor, patio òf balkon i klùis práktiko pa sambuyadó riba waf, e wéspetnan por gosa di un eksperensia na laman, kaminda bo por mira e piskánan direktamente for di bo balkon. Dentro di poko e hotèl ta haña un waf nobo tambe! Dos otro hotèl ku tambe a haña nan ‘make-over’ ta e butik hotèl luhoso kantu di laman, The Bellafonte, ku resientemente a pasa den un renobashon grandi, i Captain Don’s Habitat, ku a haña entre otro un pisina nobonobo.

 

21. Durante e último lunanan Sorobon Luxury Beach Resort a risibí un ‘make-over’ grandi. E risòrt a renobá su kasnan na bich kompletamente i tambe su espasionan komun, pa ofresé un esfera fresku i moderno ku ta komplementá Boneiru su bunitesa natural. E Beach Bar tambe a evolushoná i bira un konsepto kompletamente nobo: Reef Bar. E risòrt akí ta un sitio perfekto pa relahá, pa disfrutá di bibidanan refreskante i pa gosa di e bista impreshonante riba laman di Sorobon.

Pa hasi bo paseo kompleto

Despues di un paseo yen di aventura i eksplorashon nòn stòp, bo por relahá dushi asina riba pista di baile òf kumpra algun suvenir ku ta yuda bo kòrda bo isla karibense faborito. Si bo ta en buska di algu mas permanente, nada no ta mas inolvidabel ku enk nobo!

 

22. Bon Waire ta un butik di moda den sentro di siudat, ku ta spesialisá den paña i asesorio, for di paña pa landa te trahenan elegante pa ora di sena. Pa un gran parti ta kose e pañanan na Boneiru mes, ku un selekshon di asesorio trahá na man for di henter mundu. Pa mas opshon pa paña pa landa, na fin di aña 2023 a habri Tulum Swimming. Akí nan ta bende markanan oropeo di paña di landa i prenda trahá na man i na midí di e partner lokal Palma Jewelry Bonaire. 

 

23. Awor bishitantenan por keda kòrda nan biahe pa Boneiru pa semper, ku un bishita rápido na Kralendijk Ink. Kralendijk Ink Tattoo Shop Bonaire, ku nan a habri na aña 2023 den kurason di Playa – Kralendijk, ta ofresé un ekselente studio ku un tim di artista eksperensiá ku ta dediká nan mes na ofresé obranan di arte eksepshonal i un eksperensia inolvidabel. Komo parti di Boneiru su branding ‘It’s In Our Nature’ i e kampaña di Bonaire Bond, bishitantenan i habitantenan lokal por haña un tatuahe memorabel di aspektonan spesial di nos isla.

 

24. Finalmente bo por baila henter anochi na Club Rush Bonaire, un klup nokturno nobonobo ku ta ofresé amantenan di músika i baile un hòtspòt lokal nobo pa deskubrí i ku ta e manera perfekto pa terminá e anochi despues di un dia yen di aventura.

Reservá un buelo i enamorá di Boneiru

E 24 eksperensianan akí ta solamente ‘snapshots’ di loke ta warda nos biaheronan na Boneiru i nan ta aun mas aksesibel ku e buelonan nobo ku a añadí for di Merka i Canada. Kompanianan grandi di aviashon a introdusí buelonan nobo mará na temporada i opshonnan èkstra di buelo pa na aña 2024 hasi konekshon ku e Perla den Karibe akí:

 

• WestJet ta ofresé awor su promé buelo nòn stòp for di Toronto pa Boneiru. Nan ta bula e ruta nobo akí te meimei di luna di aprel 2024, un biaha pa siman riba djamars.
• Entre yanüari i aprel United Airlines ta ofresé buelo èkstra riba djadumingu i djárason for di Newark.
• Te ku 6 di aprel 2024 Delta Airlines ta amplia su buelo di kustumber riba djasabra ku kuater buelo nobo pa siman riba djaluna, djamars, djaweps i djasabra for di Atlanta.
• American Airlines ta introdusí un buelo èkstra tambe den luna di yüni i yüli 2024 riba djabièrnè for di Miami, komo komplementashon riba e buelonan eksistente di djárason i djasabra.

Dedikashon kontinuo 

Na aña 2022 nos isla a lansa e Bonaire Bond i ta rekòrdá nos bishitantenan pa firma e promesa importante akí promé ku nan bai eksplorá e destinashon. Diseñá komo un rekordatorio di kon krusial turismo sostenibel ta pa supsistensia di nos komunidat lokal i e siguiente generashon, e Bonaire Bond ta un paso nobo den un historia largu di esfuerso pa konservashon di naturalesa. Nos isla lo kontinuá ku su kampaña di sosten pa medio di adoptá palu di koral na nòmber di tur hende ku firma pa esaki, via Reef Renewal Foundation Bonaire. For di aña 2012 Reef Renewal Foundation Bonaire ta dediká su mes na rekuperashon di Boneiru su refnan di koral, pa medio di kultivo di koral i téknikanan di restorashon inovativo. Tur aña nos isla ta traha riba oumentu di e esfuersonan akí i na aña 2023 e kapasidat di produkshon di e kultivo a subi ku 19%, ku kasi 22.000 koral. Na mes momentu a planta mas ku 8200 koral bèk riba e refnan stimá di Boneiru, e kas di e fantástiko bida bou di laman ku nos isla ta konosí p’é.