Rumannan bendicion, Hesus ta un Dios di amor. Pa transmiti nos Su amor, El a scoge diferente personanan cu a bira Su Videntenan riba mundo. Asina nos por a scucha den transcurso di añanan di Aparicion. Aruba no a keda atras, Hesus a pone Su mirada misericordioso riba un isla chikito cu yama Aruba y El a scoge un persona pa ta Su Vidente. Dia 4 di October 1998 Hesus a manifesta su mes. Cu un corona di perla blanco, inconscientemente mi a corona Divino Niño cu ne.
E anochi ey e corona di perla a cuminsa saca splendor y a cambia di color. Hesus a aparece na mi persona y a bisa mi lo siguiente: “Ami ta esun cu a duna bo, bo bista bek”, pasobra tempo mi tabata chikito, cement blanco a bay den mi wowo y mi a keda ciego. Hesus a puntra mi si mi kier traha pe, y mi a contesta cu si. Asina mi a bira Vidente Valerie, Hesus su Vidente di mas chikito. 24 aña a pasa, 24 aña di amor y traha pa e Salbador di Mundo. 24 aña ricibiendo Mensahenan di Hesus y di Mama Maria pa nos salbacion. 24 aña cu diferente Milagernan a sosode, entre otro; cambionan di bida, sanacion, liberacion, transformacion, combercion y mucho mas. Amor ta algo cu mi tin pa tur hende di paden y di pafo, manera e amor cu Hesus tin pa tur su yiunan. Awor mas cu nunca nos mester di su yudansa. Koyari su portanan ta habri pa tur hende. Dia pa dia ta yegando mas hende cu ta den un of otro problema, asta hendenan di otro paisnan. Manera cu nan yega nan ta bin y puntra pa mi. Na Koyari, ami Vidente Valerie, ta atende tur hende cu amor, cu ta bin pa busca un solucion, boluntariamente, paso e atake di e malo ta hopi fuerte den e ultimo tempo nan aki. Nos mester ta consciente y sincero cu nos mes, busca e caminda di berdad. Bishita e kapel na Modanza y esun di Koyari y haci boso oracion di curason. Corda
boso mester sigui boso curason. Ningun otro caminda boso por haña un Vidente cu ta resa y yuda boso manera ami. Bin Koyari y conoce mi pa boso mes. Mi ta cla pa scucha y yuda boso cu hopi amor y semper cu un sonrisa na cara. Bin Koyari, pa boso ricibi e bendicion cu ta bin di shelo. Tin hopi hende ta hungando cu sentimentonan di otro. Corda cu Hesus ta un Dios di Amor. No tarda pa bin, miho boso ta na tempo. Busca Dios prome cu tur cos, pa boso logra den bida. Koyari a wordo construi cu hopi amor y ta ofrece diferente siñansanan, bida di Hesus, Mama Maria, Santonan y Angelnan, pa boso crece spiritualmente. Loke ta di Dios semper ta sigui duna fruta y florece. Boso seyo tin di briya mas cada dia, no laga e luz paga den boso.
Sigui cana den pasonan firme cu Hesus y Mama Maria. Cu fe y confiansa boso ta logra den e poderoso nomber di Hesus. Confia y sigui confia den e infinito amor di Dios y pa engrandece loke Dios a pone pa nos, den nos caminda. Como conseho mi kier bisa boso; si boso wak un hende cay na caminda, para y yuda pe persona lanta bek. Esaki ta e pruebanan di bida cu tur hende ta haña, un mas cu otro, cu ta conta pa nos tur. Ricibi di mi un bendicion pa boso tur logra den bida. Cu hopi amor di Vidente Valerie.
