ORANJESTAD,Aruba
Cu pasonan concreto den inovacion y educacion pa modernisa, fortalece y capacita nos como pais pa e retonan actual y di futuro
Aña 2019 a finalisa cu aliento positivo pa nos pais. Riba tereno financiero Gobierno ta treciendo stabilidad bek y e presupuesto suppletorio pa di dos aña consecutivo no tin deficit adicional.
Tarifa di coriente ta baha cu 10% pa casnan di famia, 9% pa fundacion y scolnan y 7% pa comercio. Esaki ta un noticia hopi alentador ya cu ta laga mas placa den e cartera familiar, e ta baha inflacion y e ta baha e ‘cost of doing business’.
Pensioen di biehes ta aumenta cu 42 florin pa pareha casa y 25 florin pa pensionadonan cu no ta casa y esaki ta di dos aña sigui cu Gabinete Wever-Croes ta aumenta pensioen di biehes.
E aumento di minimumloon cu pa prome biaha ta surpasa 1800 florin pa luna, tambe a cay den bon tera, especialmente pa e hecho cu esaki tabata un decision unanimamente di gremio comercial y gremio sindical, un bunita forma di colaboracion.
Aña 2020 ta bira e aña di finansas publico saludable, y di recuperacion economico. E comienso di e decada nobo.
“Asina Aruba a cera aña 2019, e aña di famia y cuido di nos muchanan. Durante di e aña Gobierno a enfoca riba e norma y balornan importante pa un famia fuerte, amor den famia, tolerancia, respet pa hende, bestia y naturalesa, comprencion, pasenshi, integridad, gratitud, disciplina y lealtad, voluntad pa yuda otro y sin interes, optimismo y cortesia, bon manera. Diferente actividad y dialogo a tuma luga durante e aña cu e meta pa conecta y fortifica famianan mas”, Prome Minister Evelyn Wever-Croes a expresa.
2020: Aña di Innovacion y Enseñansa
E retonan den 2019 tabata grandi, pero nos a haci tur esfuerso pa no enfoca riba e retonan so. Mientras cu nos tabata enfrenta tur e retonan, mes momento nos tabata enfoca riba futuro, a traves di Innovacion. Nos ta preparando nos futuro generacionnan pa e retonan di futuro. Cosnan ta cambiando lihe, mas cu mitar di muchanan cu awe ta bay scol basico lo traha den trabounan cu awe no ta ni existi. Y nos compromiso ta pa prepara nan pa e retonan ey.
Prome Minister Evelyn Wever-Croes, prome cu ciere di aña, den nomber di Gobierno di Aruba, a decreta aña 2020 como aña di Innovacion y Enseñansa. Gobierno kier dal e pasonan concreto den inovacion y educacion pa modernisa, fortalece y capacita nos como pais pa e retonan actual y di futuro
Nos ta pensa riba innovacion den tur sentido di palabra. Innovacion economico, innovacion social, innovacion den salud, innovacion den nos leynan, innovacion den sector primario y principalmente innovacion den enseñansa. Habri scolnan bek cu ta cera, sigui amplia curriculum di scolnan cu agricultura, musica, arte, digitalisacion y sigui innova den enseñansa.
Un proyecto hopi importante ta e proyecto piloto di digitalisacion di scol basico Cacique Macuarima y scol preparatorio Aterima. Klasnan a haya bordchi digital, C-touch, nan a haya computer y laptop, nan a haya airco, y nan ta haya lesnan for di computer. Mas y mas scol ta mirando avansenan den innovacion, preparando nos muchanan pa un futuro sigur.
“Tambe, e diferente ministerionan lo alinea pa establece un agenda y puntonan di prioridad.
Gabinete Wever-Croes a pone e fundeshi pa e-Government, y lo sigui construi riba e fundeshi aki den futuro. e-Government lo percura pa mas eficiencia den gobierno, pa miho servicio na ciudadanonan y pa mas transparencia den procesonan administrativo y pues menos corupcion”, Prome Minister Evelyn Wever-Croes a enfatisa.
