Durante dos dia un grupo di mas o menos 15 lider di MPB a sigui un curso di dos dia tocante historia di politika na Boneiro. Esaki a sosode den sala di Fundacion Historiko Cultural Boneriano (FuHiKuBo). Bòi Antoin i René Roders a duna e curso aki. E cursistanan a bisa na final cu nan a keda bou di impresion di loke nan a tende.
E promee anochi Antoin a bay bek pasado, papiando di e tempo prome cu partidonan politiko a lanta riba e isla aki. Entre 1833 i 1938 tabatin ‘Koloniale Raad’, un oorgano di consulta di Colonia Curaçao. Esaki tabata e predesesor di Staten di Antia Hulandes. ‘Koloniale Raad’ tabata conseha gobernador di colonia. ‘Curaçao en Onderhorigen’ te na 1936 tabata e nomber uza pa Aruba, Boneiro, Corsou, St. Eustatius, Sint Maarten i Saba.
Decada cincuenta
Tanto Antoin como Roders a dedica hopi atencion na decada cincuenta, tempo cu loke por considera como politika local a haci su entrada, cu Partido UNI i Partido Progresista Boneriano. Despues di kiebro entre Lodewijk (LD) Gerharts i Julio Abraham, lidernan di UNI, a bin cambio significante den panorama politico. Grupo Gerharts a integra cu Partido Progresista Boneriano (Uní), mientras ku Abraham a lanta Partido Demokratiko Boneriano.
Roders, kende aña pasa a publica un buki tocante biografia di LD Gerharts, a papia durante un ora i mei tocante e persona aki, kende a bira viktima di un conspiracion di su opositornan politiko, cu a pone cu el a resulta den prizonn i pone fin na su carera polítiko.
Despues
Bòi Antoin a atendé historia di politika den e decadanan ku a sigui desde e tempo ei, manera e entrada di Toon Abraham den politika, sigui despues pa su ruman Jopi Abraham i seguidamente Jopi su yu Clark Abraham como lider di Demokrat. Mas aleu Antoin a papia riba Broertje Janga, un fenomeno den politica Boneriano, kende tambe a bira victima di conspiracion. E tabata den Demokrat, pero den e prome mita di decada sesenta ta bandona e partido aki i ta bay eleccion cu Partido Obrero Boneriano (POB), cu tabata existi caba.
A atende e eleccion historico pa Staten dia 5 di september 1969, den cua e lista di Combinacion pa Cambio (PPBU i POB) a tumba Demokrat ku tabatin 15 aña na poder. Un di e consecuencianan tabata lantamento di Partido Patriotico Boneriano.
Antoin a papia di partidonan politico ku a eksisti durante 70 aña, tambe di e politikonan mas marcante, sistema di hiba politica, asta marcha, cantica i djengelnan politiko.
E participantenan na e curso a keda impresiona pa tur loke a sosode den historia politiko, specialmente e casonan di LD Gerharts i Broertje Janga.
MPB:
Partido MPB for di su lantamento 10 aña pasá (15 di desember 2013) ta duna training na su lidernan. Historia polítiko sigur ta hopi importante pasobra si bo sa bo historia bo por tene cuenta cu cosnan malo cu a pasa i sòru pa nan no ripití. Claro, cosnan cu a pasa cu ta bon nos mester siña di nan i trata pa haci nan mihó.
MPB ta sigui duna diferente training na su lidernan pa asina nos tin lider bon formá. Nos siguiente training lo 30 di òoctober 2023 cu e topico ‘Structura i proceso di Gobernacion di Boneiro.
