Ki dushi bendicion y alegria den famia, ora un baby ta nace ! A pasa basta tempo ta pensa con
su nomber lo bira, con lo yamele, na su nomber completo of na su nomber di carinjo. Esnan cu
a bira welo y wela tambe ta cana ariba nubianan di alegria ! Nan ta cla pa “hole’ e baby recien
naci. Ta ser bisa, cu, e mayornan cu a hasi un bon trabao den stima y educa nan yuinan ta ricibi
e bendicion di bira welo cu wela. Un mucha ta e solo y curazon den e hogar. Tur atencion ta p’e
. Y ta ora e mucha crese bira grandi, por wak na dje, e frutanan, con ela wordo lanta na cas.
Pasobra, lamentablemente no ta tur hogar ta un ciclo rondo riba su mes. Tin famianan cu mama
soltera, of famianan cu mayornan divorcia, cu no ta cu nan yuinan henter dia, tur ora. E mucha
ta crese cu e cosnan cu e ta wak y tende rond di dje. E ta manera un spons cu ta absorba tur
locual ta pasa den su cas. Dia 20 di November ultimo tawata “Dia di mucha”. Ora cu ta para
keto y reflexiona riba nos muchanan, si nan ta bon di salud, si nan ta felis, si nan ta contento cu
nan ambiente, cu nan famianan y amigonan. Tawatatin un “flyer” algun tempo atras, cu tur e
derechonan di un mucha riba dje, mi ta corda bon, pasobra mi a laga saca copia y parti un
biaha pa muchanan scout di mi grupo Kimball O’Hara. Y aunque mi no ta activo mas den
scouting, “Once a scout, always a scout” ta valido pa Lady Ruth tambe, cu a hiba e nombernan
di Sahi, Hathi y despues Bubbles den Scouting, e seccion di e bevernan, esnan mas chikito di
grupo.
Awendia, ora mi topa cu un “Welp” of “Bever” di “Mi” cu ya ta un hoben, of un hoben adulto, un
mama of tata su mes, nos ta sinti nos hopi bendiciona, pa wak nan grandi y madura. Dos di nos
grupo a bira Dokter, tin ta traha na Banco y of den un otro ramo bunita cu nan mesun
responsabilidadnan. Tin tambe cu cambio di cara un crenchi, cu nos no ta reconose y of nos a
lubida nan nomber. Ta mas facil nan corda nos cu nos corda nan aparentemente, pasobra Lady
Ruth a topa cu asiiina hopi hende den su bida den su trabaonan den Radiodifusion, Banco,
Hotel y Scouting, cu ta dificil corda tur nan nomber. Hopi biaha nos ta corda nan cara bunita y
ora yega cas, ta “place’ nan, na unda a conose nan. Pa nos tur, tur dia ta dia di mucha, tur dia
ta dia di mama, tur dia ta dia di tata, pasobra tur dia nos ta den famia cu nos mesun bida,
experiencia y lesnan den bida. Pesey Lady Ruth kier a felicita tur tur mucha ainda, y
specialmente “su” muchanan di hopi tempo pasa den grupo Santanero Dakota y despues grupo
KImball O’Hara Piedra Plat pa e bon hende cu nan ta, cu nan tawata dispuesto di sinja cosnan
di scouting cu por a yudanan den nan bida diario, pasando dushi hunto kampando, hike,
participa na jamboree y tur otro actividadnan scout, cu ta inspira cada un di nan cu algo bon
sigur. Pabien cu boso ta profeshonalnan cu curason awe, trahando na bienestar di bo mesun
famia y comunidad en su totalidad. Danki na tur lidernan di instancianan trahando cu mucha, pa
educa, re-educa y of forma nos muchanan, cu lo ta nos lidernan di majan. Spera cu muchanan
“mondig’ di awendia, respeta nan mes na prome lugar, nan mayornan, nan maestro y
maestranan di scol, di deporte , di scouting etc. Y na mayornan : Por fabor duna e bon ehempel
di respeta y trata otro cu bon manera. Duna boso yuinan e bon ehempel tur dia . Corda, cu,
local ta sembra ta cosecha. Si boso tawata tin’e hopi duro como mucha, no tin mester di castiga
boso yuinan pa esey, sinja di boso experiencianan y duna amor y atencion bon na boso yuinan.
Boso no a bira mayornan pa just tin pret nan dilanti, huma y bebe y laga nan hasi trabau di cas

nan so.Ser famia, ser un team. Cuida otro, stima otro, pordona otro, papia nechi cu otro y no
papia nechi cu hendenan stranjo si, pero cu bo mesun hendenan tambe na prome lugar. Nos ta
sigui reflexiona riba e dia importante pa nos muchanan. Pa nan tin bon amiga y amigo tambe,
no solamente nan cellular. Pa hunga wega di mucha di antes tambe y no solamente weganan
riba computer. Pa sinja nos muchanan bisa danki y sinjanan reza, papia den oracion cu Jesus,
corda pakico nan a “ricibi y hasi nan prome santa comunion “ y despues confirmacion.
Nos tur ta corda nos tempo di infancia, tempo nos tawata mucha den nos bario. Nos tambe kier
e mihor pa nos muchanan. Pero no na material na prome lugar, sino pa e crese cu confianza
den su mes, e stima su mes y respeta su mes na prome lugar. E sinja di su foutnan, e sinja
comporta debidamente y cu pa e sa, cu cos no ta cai fei shelo pero e tin cu studia y despues
traha p’e. Un “bearhug” grandi diki gordo pa tur nos muchanan ! Stay safe ! Love you too.