Den e siman di 22 te 30 di yanüari di e aña aki a bini 12 kaso konfirmá di dengue aserka, asina e departamento di Salubridat Públiko ta laga sa. For di 1 di yanüari 2024 te fin di siman pasá a konstatá un total di 18 kaso di dengue na Boneiru. Serka dòkternan di kas e kantidat di hende ku keho ku ta parse dengue a subi un tiki. Por a spera esaki komo ku último tempu a yobe hopi, e sangura di dengue ta pone webu den awa ku ta keda para.
Departamento di Salubridat Públiko ta hasi un yamada na tur hende pa evitá ku dengue ta sigui plama. Por hasi esaki hasiendo tur opheto ku awa ta keda para aden bashí. Ta importante tambe pa hende pèrkurá ku e sangura di dengue no ta haña chèns di pika nan. Por ehèmpel por hasi esaki huntando nan kurpa ku un krema kontra sangura ku DEET aden.
Kehonan den kaso di dengue i konseho
Mayoria hende ku haña dengue, no tin ningun òf kasi nada di keho. Un grupo chikitu di hendenan ku dengue ta haña keho. Ta bai e ora ei pa doló tras di wowo, doló di kabes, kentura haltu, doló den djòint i múskulo, rebultashon na kurpa. Mayoria biaha e kehonan ta bai di nan mes despues di 1 òf 2 siman. E chèns pa haña keho hopi serio den kaso di dengue ta hopi chikitu.
E konseho ta pa ora tin keho pa bebe sufisiente awa. Ora tin kentura, e persona por usa solamente paracetamol. No usa remedi ku por hasi sanger awa manera aspirin. Òf remedi ku por okashoná keho di stoma, òf asta bludumentu manera Ibuprofen, òf Voltaren etsetera. Si e kehonan ta serio, e konseho ta pa bai dòkter di kas. Departamento di Salubridat Públiko ta traha estrechamente ku dòkternan di kas, laboratorio i hòspital.
Asina aki bo ta prevení un subida di e kantidat di sangura di dengue
Kita tur opheto ku awa aden rònt di kas manera
-baki
-tayer
-bòter
-bleki
-tapa baki/barí ku awa aden ku un paña,
pone un elastik òf kabuya rònt di e paña
Asina akí bo ta prevení piká di un sangura di dengue
-Hunta bo kurpa ku un krema ku DEET aden
-Usa un sprei ku DEET den dje i spùit esaki na bo kurpa
-Bisti paña ku un koló kla ku ta tapa bo kurpa bon
– Usa skrin na kas
-Tene bentana i porta bon será
-Semper drumi bou di un mosketero
-Usa flit kontra sangura pa tene kas liber di sangura
Dòkternan di kas i laboratorio ta informá e departamento di Salubridat Públiko di kasonan di dengue. Despues di un notifikashon, departamento di Salubridat Públiko ta tuma kontakto ku e persona infektá. E persona akí ta haña tep i konseho di e departamento. Despues un inspektor di e departamento ta bai di bishita na kas di e persona akí. Tarea di inspektornan ta entre otro pa eliminá kriaderonan di e sangura di dengue. P’esei nan ta kontrolá si den besindario di e kas di e persona malu tin kriadero di e sangura di dengue. Si ta asina, e ora ei ta trata e kriaderonan.
Bo mester di konseho òf yudansa pa awa den barí òf renbak? Of bo tin hopi molèster di sangura? Yama e ora ei e departamento di Salubridat Públiko na e number 715-5324.
Pa mas informashon tokante dengue, bishitá www.bonairegov.com/sangura
