Diesun studiante di e estudio Trabou Social y Desaroyo na Facultad di Arte y Sciencia (FAS) na
Universidad di Aruba a gradua cu un Bachelor of Arts riba 12 di juli 2024. E impresionante
ceremonia di graduacion a tuma luga den auditorio di EPI. Esaki tabata pa motibo di trabou di
renobacion na Universidad di Aruba. Presente na e ceremonia tabata mas tanto famia-, amigo- y
sernan keri di e graduadonan. Dr. Mieke Droog, Rector Suplente y Decano di FAS; Dr. Salys
Sultan, Decano Suplente di FAS; Dr. Marlous Tiekstra, Director di e programa SW&D;
Coachnan di Investigacion; instructornan di pasantia y profesornan tambe tabata presente. E
graduacion tabata un ceremonia di gradicimento na momento cu cada un di e diesun
graduadonan a subi stage pa personalmente gradici tur esnan cu a tabata e biento bou’i nan hala
cu a pusha nan durante nan biahe.
Kimberly Wever, MSc, Consehero Academico di e klas di graduado, a dirigi palabra na e
graduadonan, percurando pa duna algun conseho final personal na cada un di nan. Dr. Mieke
Droog tambe a dirigi palabra na e graduadonan, compartiendo su biahe personal cu nan
cuminsando cu un Bachelor den Trabou Social pa Rector Suplente di Universidad di Aruba.
Esaki a sirbi como testimonio y estimulo pa e studiantenan cu cu un Bachelor den Trabou Social,
no tin limite pa loke nan kier logra den bida.
E ceremonia a culmina cu un cena exkisito. Tabata un goso pa mira cada graduado sinta na mesa,
gosando y celebrando di nan logronan academico cu nan sernan keri.
Nos ta desea cada un di e diesun Trahadonan Social profesional nobo aki hopi exito durante nan
siguiente biahe na Aruba y den e mundo cu ta wardando pa haci uzo di nan potencialnan
profesional.
